കഴിഞ്ഞ ജൂലൈ മുതല്‍ അംഗങ്ങള്‍ക്ക് പരസ്പരം കണ്ടു സംസാരിക്കാന്‍ ഫെയ്‌സ്ബുക്ക് വീഡിയോ ചാറ്റ് സംവിധാനം തുടങ്ങിയിരുന്നു. ഫെയ്‌സ്ബുക്കിനെ സ്‌കൈപ്പില്‍ കുടിയിരുത്തിയതോടെ അവരുടെ ഫോണ്‍നമ്പറിലേക്ക് വിളിക്കാനും സൗകര്യമായി. പക്ഷേ വീഡിയോ ചാറ്റിന്റെ കാര്യത്തില്‍ മാത്രം ഫെയ്‌സ്ബുക്ക് വഴങ്ങിയിരുന്നില്ല.
കൈപ്പിന്റെ 17 കോടി അംഗങ്ങളും ഫെയ്‌സ്ബുക്കിന്റെ എണ്‍പതുകോടി അംഗങ്ങളും തമ്മില്‍ നേരിട്ട് കണ്ടു സംസാരിക്കാന്‍ ഒടുവില്‍ വഴിയൊരുങ്ങി. ഈയിടെ പുറത്തിറങ്ങിയ സ്‌കൈപ്പ് 5.7 വിന്‍ഡോസ് പതിപ്പിലും സ്‌കൈപ്പ് 5.4 മാക് പതിപ്പിലും സ്‌കൈപ്പ് അംഗങ്ങള്‍ക്ക് ഫെയ്‌സ്ബുക്ക് അംഗങ്ങളെ നേരില്‍ കണ്ട് സംസാരിക്കാനുള്ള സൗകര്യമുള്‍പ്പെടുത്തിയിരിക്കുന്നു. ഫെയ്‌സ്ബുക്കില്‍ വീഡിയോ ചാറ്റ് ഇന്‍സ്റ്റാള്‍ ചെയ്തിട്ടുണ്ടെങ്കില്‍ സ്‌കൈപ്പില്‍ നിന്ന് പരസ്പരം വീഡിയോ കോളിങ് നടത്താം. അപ്പുറത്തുള്ളയാള്‍ക്ക് സ്‌കൈപ്പ് അംഗത്വം വേണമെന്നില്ല ഫെയ്‌സ്ബുക്കില്‍ വച്ചു തന്നെ വീഡിയോ കോളിങ് സ്വീകരിക്കുകയുമാകാം.
പുതിയ കരാര്‍ ആര്‍ക്കായിരിക്കും ഗുണം ചെയ്യുക എന്ന ചോദ്യത്തിന് വലിയ പ്രസക്തിയൊന്നുമില്ല. മലയാളികളെ സംബന്ധിച്ചിടത്തോളം ഒന്നുണ്ട്. യൂറോയും ഡോളറും റിയാലുമൊക്കെ വരുന്ന നമ്മുടെ വിദേശമലയാളി വീടുകളില്‍ ഫെയ്‌സ്ബുക്ക് എന്താണെന്നറിയില്ലെങ്കില്‍ പോലും കൊച്ചു കുട്ടികള്‍ മുതല്‍ പ്രായമായവര്‍ക്കു വരെ സ്‌കൈപ്പ് ഐക്കണ്‍ തേടിപ്പിടിച്ചു ക്ലിക്കു ചെയ്ത് അതുവഴി വീഡിയോ ചാറ്റു ചെയ്യാനറിയാം. അപ്പുറത്തിരിക്കുന്നയാള്‍ക്ക് സ്‌കൈപ്പ് തുറന്നിട്ടില്ലെങ്കിലും വീഡിയോ കോള്‍ സ്വീകരിക്കാമല്ലോ. ലോകത്തെല്ലാവര്‍ക്കും ഇത് ബാധകമാണ്. എന്തൊക്കെയായാലും ഗുണം സ്‌കൈപ്പിനു തന്നെ.
No comments:
Post a Comment