ഇത്രയേറെ ജനപ്രിയമായിട്ടും ഫെയ്‌സ്ബുക്ക് ചില പൊരുത്തക്കേടുകള്‍ കണ്ടെത്തി പരിഹരിക്കാത്തതില്‍ നമുക്കെല്ലാം പരിഭവമുണ്ടായിരുന്നു. ഗൂഗിളിനെ പോലും പലതവണ അടിയറവു പറയിപ്പിച്ച ഫെയ്‌സ്ബുക്ക് ഫോട്ടോ ടാഗിങിലെ അരാജകത്വവും ചാറ്റ് വിന്‍ഡോയുടെ പ്രശ്‌നങ്ങളും പരിഹരിക്കാന്‍ കാലം കുറേയെടുത്തു. പ്രൈവസി സെറ്റിങ്‌സില്‍ തുടങ്ങിയ മിനുക്കല്‍ ജോലികള്‍ കൂടുതല്‍ സജീവമായത് ഈയിടെയാണ്.
നിത്യജീവിതത്തിലെന്നതു പോലെ വെര്‍ച്വല്‍ ലോകത്തും ആരെയൊക്കെ നമ്മള്‍ സുഹൃത്തുക്കളാക്കിയെന്നതുപോലെ ആരൊക്കെ നമ്മുടെ സൗഹൃദം മുറിച്ചു കളഞ്ഞുവെന്നതും പ്രധാനമാണ്. ഫെയ്‌സ്ബുക്കിലെന്നു മാത്രമല്ല മിക്ക സോഷ്യല്‍ നെറ്റ് വര്‍ക്കിങ് സൈറ്റിലും ഇതൊന്നുമറിയാന്‍ കഴിഞ്ഞിരുന്നില്ല. അയച്ച ഫ്രണ്ട് റിക്വസ്റ്റു പോലും നമമുടെ അക്കൗണ്ടില്‍ കണ്ടെന്നു വരില്ല. എന്നാല്‍ സുക്കര്‍ബര്‍ഗ് ഇക്കഴിഞ്ഞ ദിവസം വെളിപ്പെടുത്തിയ 'ടൈംലൈന്‍' സംവിധാനം രംഗത്തെത്തുമ്പോള്‍ പോസ്റ്റ് ചെയ്ത ചിത്രങ്ങള്‍ക്കും സന്ദേശങ്ങള്‍ക്കുമൊപ്പം ആരുമറിയാതെ ഇടക്കുവെച്ചു പൊഴിഞ്ഞുപോയ സൗഹൃദങ്ങളും കണ്ടെത്താനാകും. സാന്‍ഫ്രാന്‍സിസ്‌കോയില്‍ നടന്ന എഫ് 8 ഡെവലപ്പര്‍ കോണ്‍ഫറന്‍സില്‍ ഒരു പുതിയ ഫെയ്‌സ്ബുക്ക് തന്നെയാണ് മാര്‍ക് സുക്കര്‍ബെര്‍ഗ് അവതരിപ്പിച്ചത്.
ഓരോ കാലത്തു നമ്മള്‍ നടത്തിയ സംഭാഷണങ്ങള്‍ പങ്കുവെച്ച വീഡിയോകള്‍, സംഗീതം, ചിത്രങ്ങള്‍ എല്ലാം ക്രമത്തില്‍ അടുക്കിവെച്ച 'നിത്യജീവിതത്തിന്റെ തിരുശേഷിപ്പാണ്' ടൈംലൈന്‍. ഫെയ്‌സ്ബുക്ക് ജനിക്കുന്നതിനു മുമ്പുള്ള നമ്മുടെ ചരിത്രവും ഇവിടെ ചേര്‍ക്കാം. ടൈംലൈന്‍ നമ്മുടെ നിയന്ത്രണത്തിലാണെന്നു ചുരുക്കം. ഓരോ പേജിലും ഒരു കവര്‍ഫോട്ടോ, പരമ്പരാഗത ശൈലിയില്‍ നിന്നു മാറിയ ലേ ഔട്ട് എല്ലാം പുതുമയാണ്. വലതുഭാഗത്തുള്ള 'സമയക്രമത്തില്‍' ക്ലിക്കു ചെയ്ത് അതാതുകാലത്തെ പോസ്റ്റുകളിലേക്കു പോകാം. മൊത്തത്തില്‍ ഒരു മാഗസിന്‍ ലുക്ക്. എന്നാല്‍ പരമ്പരാഗത ശൈലിയില്‍ നിന്നും മാറിയെന്നു വിമര്‍ശിക്കുന്നവരുമുണ്ട്. എന്തൊക്കെയായാലും ഫെയ്‌സ്ബുക്കിലെ പുതുമകള്‍ക്കു വേണ്ടി കാത്തിരിക്കുകയാണ് ലോകം.
No comments:
Post a Comment